Մահացել է Արցախի ԱԱԾ Հադրութի շրջանային բաժնի պետը

Արցախի ԱԱԾ-ն տեղեկացնում է․ Նոյեմբերի 15-ին կյանքից անժամանակ հեռացել է Արցախի Հանրապետության ազգային անվտանգության ծառայության Հադրութի շրջանային բաժնի պետ, գնդապետ Սերգեյ Ալեքսեյի Միրզոյանը: ԱԱԾ ղեկավարության և անձնակազմի կողմից ցավակցում ու զորակցություն ենք հայտնում Սերգեյ Միրզոյանի ընտանիքին, հարազատներին ու բարեկամներին։ Սերգեյ Միրզոյանը ծնվել է 1979թ.-ին, Հադրութ քաղաքում: 1996-2007թթ.-ին ծառայել է ԼՂՀ ՊԲ-ում: 2007թ.-ին ավարտել է «Գրիգոր Նարեկացի» համալսարանի «Իրավագիտություն» բաժինը:

2007թ.-ից ծառայում էր ԱՀ Ազգային անվտանգության ծառայությունում: Ունի մի շարք պետական և գերատեսչական պարգևներ: 2012թ.-ին պարգևատրվել է «Ծովակալ Իսակով», 2015թ.-ին՝ «Մարտական համագործակցության համար», 2016թ.-ին՝ «Մարտական ծառայություն» մեդալներով: 2015թ.-ի հունիսի 1-ից զբաղեցնում էր ԱՀ ԱԱԾ Հադրութի շրջանային բաժնի պետի պաշտոնը:

2019թ.-ի օգոստոսի 12-ին պարգևատրվել է «Վահան-2019» շնորհակալագրով՝ հատուկ սահմանային օպերացիայի ընթացքում ՀՀ Ազգային անվտանգության ծառայության Սահմանապահ զորքերի հետ համագործակցության համար: 2019թ.-ի դեկտեմբերին՝ ԱՀ Նախագահի հրամանագրով Ս. Միրզոյանին շնորհվել է «գնդապետ»-ի զինվորական կոչում: 2020թ.-ի սեպտեմբերի 27-ին Արցախի դեմ սանձազերծված պատերազմի առաջին իսկ պահից Սերգեյ Միրզոյանը գտնվում էր Հայրենիքի պաշտպանության առաջնագծում:

Նա արիաբար պայքարել է Հադրութ քաղաքի, Հադրութի շրջանի և Արցախի մյուս բնակավայրերի պաշտպանության համար մղվող մարտերում: ԱՀ պետական սահմանը պաշտպանելիս ցուցաբերած բացառիկ քաջության ու արիության համար 2020թ.-ի հոկտեմբերի 13-ին ԱՀ Նախագահի հրամանագրով պարգևատրվել է «Մարտական խաչ» 1-ին աստիճանի շքանշանով: Ամուսնացած էր, ունի երկու դուստր։

Նյութի աղբյուրը` Yelaket.am

Оставьте комментарий